عەممار حەكیم سەرۆكی ڕەوتی حیكمە گەیشتە شاری سلێمانی و لەلایەن لاهور شێخ جەنگی هاوسەرۆكی یەكێتی و پارێزگاری سلێمانیەوە پێشوازی لێكرا و بڕیارە لە رێوڕەسمێكدا بەهۆی كوژرانی باوكی و شوێنكەوتوانی بەشداری بكات و لەگەڵ هاوسەرۆكایەتی یەكێتیش كۆببێتەوە.
بەیانی ئەمڕۆ شەممە 20ی شوباتی 2021 عەممار حەكیم بە سەردانێك گەیشتە شاری سلێمانی و لە فڕۆكەخانەی شارەكە لەلایەن لاهوور شێخ جەنگی هاوسەرۆكی یەكێتی و هەڤاڵ ئەبوبەكر پارێزگاری سلێمانییەوە پێشوازی لێكرا.
لە یەكەم وێستگەی سەردانەكەیدا حەكیم سەردانی گڵكۆی جەلال تاڵەبانی سەرۆكی پێشوی یەكێتی كرد و لە وتەیەكدا وتی: لەگەڵ یەكێتی كۆدەبێتەوە بۆ گفتوگۆكردن لەبارەی پەیوەندیی كوردی – عەرەبی، هاوكاری و هاوئاهەنگی لە كار و چارەسەركردنی كێشەكان و بابەتی بودجە، كە هیوادارین بە شێوەیەك بڕوات بەرژەوەندی عێراق و كوردستانی تێدابێت، نابێت خەڵك لە هیچ شوێنێكی عێراق نیگەرانی نەبونی موچە بێت و دەبێت سامانی عێراق بۆ هەمو عێراقییەكان بێت.
بڕیارە عەممار حەكیم لە رێوڕەسمێكدا بەهۆی یادی كوشتنی محەمەد باقر حەكیم و 83 كەسی دیكە لە پارێزگای نەجەف ولەساڵی 2003 لە تەلاری هونەری شاری سلێمانی بەشداری بكات كە ئامانجی سەرەكی سەردانەكەیەتی و تارێك پێشكەش بكات، هەروەها لەگەڵ هاوسەرۆكانی یەكێتیش كۆببێتەوە.
