دوای تۆمەتباركردنی هەرێم بە ساختەكردنی مریشكی بەسەرچو و ناردنی بۆ شارەكانی تری عێراق، وەزارەتی گشتوكاڵی حكومەتی هەرێم داوای بەڵگە لە بەغدا دەكات.
حوسێن حەمەكەریم وتەبێژی وەزارەتی كشتوكاڵ بە ماڵپەڕی فەرمیی پارتی وتوە: لە ئێستادا تەنیا چەند بەرهەمێكی زستانەی هەیە و هیچ كێشەیەكیان نییە، بەڵام هەندێ بەرهەمی كشتوكاڵ هەیە لەوانەیە لەلایەن بەغداوە قەدەغە كرابێت و لە هەرێم هێشتا قەدەغە نەكرابێت.
وتیشی: قسەكانی وەزیری كشتوكاڵی عێراق ڕەتدەكەینەوە، ئەگەر بەڵگەیەكیش هەیە داوا دەكەین بماندەنێ، لە هەرێم 10 سەربڕخانەی مریشك هەیە و هەمویان بەپێی رێنمایی و یاسا كار دەكەن و پلانمان هەیە ستیكەر و باڕكۆد لەسەر بەرهەمی ناوخۆ دابنێین، بۆ ئەوەی ئەگەر هات و بەرهەمی دیكە هەبێت بە ناوی ناوخۆوە بازرگانی پێوە نەكرێت و ساختە نەكرێت.
ئەمەش دوای ئەوەدێت پێشتر محەمەد ئەلخەفاجی وەزیری كشتوكاڵی عێراق لە لێدوانێكی رۆژنامەوانیدا ئاشكرای كرد، نەخۆشییەكی كوشندە سەری هەڵداوە و سەرچاوەكەشی لە هەرێمی كوردستانەوەیە بە هۆی ناردنی مریشكی ماوەبەسەرچو.
