لیژنەی مافی مرۆڤی پەرلەمان: تەندروستی زیندانیكراوانی بادینان خراپە

گوڵستان سەعید جێگری سەرۆكی لیژنەی مافی مرۆڤ لەپەرلەمانی كوردستان دەڵێت: تەندروستی سزادراوانی بادینان باش نییە و لەلایەن سەرۆكی لیژنەی مافی مرۆڤ و هێزە ئەمنییەكانی هەولێرەوە رێگەیان پێ‌ نادرێت سەردانیان بكەن.
گوڵستان سەعید بە ماڵپەڕی فەرمی یەكێتی وتوە: لەگەڵ چەند ئەندامێكی لیژنەی مافی مرۆڤ دوو رۆژە دەمانەوێت سەردانی زیندانیانی بادینان بكەین، بەڵام لەلایەن خودی لیژنەكەمان و هێزە ئەمنییەكانی هەولێرەوە رێگەمان نادرێت.
باسی لەوەشكردوە:زانیاریمان هەیە تەندروستی زیندانییەكان باش نیەو شوێنی زیندانیكردنیان زۆر ساردەو بێ خزمەتگوزارییە، رۆژی دادگایی كردنیان ئێمە لەوێ ئامادەبوین، بە سەرۆكی لیژنەكەشمان وتوە كە لەگەڵمان بێت بەڵام ئەو ڕەتیكردەوە، ئەركی پەرلەمانە چاودێری دەزگا شەرعییەكان بكات، بەڵام ئەو ئەركەمان لێوەرگیراوەتەوە.
جێگری سەرۆكی لیژنەی مافی مرۆڤ دەشڵێت: لەكاتی دادگایی كردنەكە بێ گەڕانەوە بۆ دادوەر، كەسی یەكەم كە لێدوانی لێوەرگیرا لەدادگا برایە دەرەوەو هێزە ئەمنییەكان لەبری دادگا بڕیاریان دەدا، داواكارین لەدادگای تێهەڵچونەوە بڕیاری دروست لەسەر ئەو زیندانیانە بدات، چونكە ئەوان نە تیرۆرستن و نە سیخوڕن، هیچ بەڵگەیەك لەسەریان نییە و تەنها گلەیی و گازندەیان لەحكومەت كردوە كە ئەوەش مافی هەمو تاكێكە.