جۆن كێربی وتەبێژی وەزارەتی بەرگری ئەمریكا “پنتاگۆن” بڵاویكردەوە: ئەو زانیاریانەیان بەكارنەهێناوە كە عێراق پێشكەشی كردون بۆ دیاریكردنی ئامانجەكانیان لەكاتی وەشاندنی گورزی ئاسمانی لە چەند پێگەیەك لەناو خاكی سوریا و لەنزیك سنورەكانی عێراق.
جۆن كێربی لە تۆڕی كۆمەڵایەتی تویتەر بڵاویكردوەتەوە: حكومەتی عێراقی لێكۆڵینەوەی لە ناسنامەی ئەو لایەنە دەكرد كە لە چەند هەفتەی رابردودا لە پشت هێرشە موشەكیەكانەوە بون، بەڵام ئەو زانیاریانەمان بەكارنەهێناوە بۆ دیاریكردنی ئەو ئامانجانەی كە هێرشمان كردە سەریان.
ئەوەش دوای ئەوەدێت، پێشتر پنتاگۆن هێرشێكی ئاسمانی كردە سەر چەند پێگەیەكی گروپە میلیشیاكانی سەربە كۆماری ئیسلامی ئێران لەنزیك سنورەكانی سوریا و ئاماژەی بەوەشدابو، بە هەماهەنگی هەواڵگری بوە لەگەڵ حكومەتی عێراق و هەرێمی كوردستان.
دوای بڵاوكردنەوەی ئەو زانیاریانە لەلایەن ئەمریكاوە، وەزارەتی بەرگری عێراق رەتیكردەوە بەهیچ شێوەیەك زانیاریان دابێت بە ئەمریكا بۆ هێرشكردنە سەر میلیشیاكان و سەرسوڕمانی خۆشی لەو جۆرە لێدوانانە راگەیاندبو.
