نوری مالكی سەرۆكی ئیئتلافی دەوڵەتی یاسا هۆشداری لە دروستبونی هەرێمێك دەدات كە ناوەندەكەی شاری ناسریە دەبێت، دەشڵێت “گەیشتوینەتە قۆناغێك كە دەوڵەت هەیبەتی نەماوە”.
نوری مالكی لە بەیاننامەیەكدا بڵاویكردوەتەوە: ئەوەی لە پارێزگای زیقار رودەدات پێشەكییەكە بۆ راگەیاندنی هەرێمێك كە ناوەندەكەی شاری ناسریە دەبێت، ئەوەش پلانی دەرەكییە و خۆپیشاندەران ئاگاداری نین و داوا دەكات هۆشداربن.
رونیشیكردوەتەوە: گەیشتوینەتە قۆناغێك كە دەوڵەت هەیبەتی نەماوە، هەروەها داواكاری خۆپیشاندەران جێبەجێ نەكراوە.
زیاتر لە هەفتەیەكە خۆپیشاندانەكان لە شاری ناسریە دەستیان پێكردوەتەوە و پێكدادانی نێوان خۆپیشاندەران و هێزە ئەمنیەكانی لێكەوتوەتەوە، تائێستاش چەند خۆپیشاندەرێك كوژراون و سەدانی تر بریندار كراون.
