دەستەی حەشدی شەعبی لەسەر هێرشە ئاسمانیەكەی ئەمریكا بۆ سەر گروپە میلیشیاكانی نزیك لە ئێران بەیاننامەیەكی بڵاوكردەوە و تێیدا دەڵێت: هێرشەكە لەناو خاكی عێراق بووە و ئەوەش ئاماژەیەكی مەترسیدارە لەسەر سەروەری و ئاسایشی خاكی عێراق.
دەستەی حەشدی شەعبی لە بەیاننامەیەكدا بڵاویكردوەتەوە: بەپێی لێكۆڵینەوەكان ئەو هێرشەی كرایە سەر هێزەكانمان لەناو خاكی سوریا نەبوە وەك ئەمریكا باسی دەكات، بەڵكو لەناو خاكی عێراقدا بوە و شەڕكەرێكمان كوژراوە.
رونیشكراوەتەوە: هێرشەكە لەسەر هێڵی سنوریی عێراق – سوریا بوە و هێزەكانمان لەئەركدا بون بۆ پاراستنی خاكی عێراق، ئەو دەستدرێژیەش پێشهاتێكی مەترسیدارە لەسەر سەروەری و ئاسایش و سەقامگیری عێراق و پێویستە بوەستێنرێت.
دەستەی حەشدی شەعبی جەختلەوەشدەكاتەوە: لەسەر لایەنە تایبەتمەندەكان پێویستە بە ئەركی خۆیان هەستن بەرامبەر رۆڵەكانی حەشد كە بەردەوامن لەسەر قوربانیدان لە پێناو ئاسایشی عێراق.
