عەبدولڕەحمان موهەندیس سەرۆكی فراكسیۆنی گۆڕان لە ئەنجومەنی پارێزگای هەولێر دەستلەكاركێشانەوەی خۆی راگەیاند و دەڵێت، بەردەوامی بەڕێوەبردنی بزوتنەوەكە بەمجۆرە گۆڕان توشی شكستی قورستر دەكات.
عەبدولڕەحمان موهەندیس لە رونكردنەوەیەكدا ئاماژەی بەوەداوە: پێشتر پاش شكستهێنانی بزوتنەوەی گۆڕان لە هەردو هەڵبژاردنی پەرلەمانی عێراق و كوردستان لە كۆبونەوەی جڤاتی نیشتیمانیدا داوام لە رێكخەری گشتی و ئەندامانی خانەی راپەڕاندن كرد دەست لەكار بكێشنەوەو ئامادەیی خۆشم نیشاندا بەیەكەوە لەگەڵ ئەوان دەست لەكاربكێشمەوە بەڵام ئەوان نەیانكرد، هەروەها وەك فراكسیۆن داوامان كرد نەچینە ناو حكومەت و ناوماڵی خۆمان رێكخەینەوە.
باسی لەوەشكردوە: هەموان لە جڤات ئاگادارن هەردەم راشكاوانە رەخنەو تێبینیم لەسەر ئەدا و هەڵوێست و بەڕێوەبەردنی بزوتنەوەی گۆڕان هەبوە تاكو زیاتر بزوتنەوەكە دورنەكەوێتەوە لە خەڵك بەڵام بەداخەوە هەمو هەوڵەكان بێ سود بون و خەڵك و ئێمەیان بێ ئومێد كرد، بەردەوامی بەڕێوەبردنی بزوتنەوەكەش بەدڵنیاییەوە ئەمجارەش لە هەڵبژاردنی داهاتودا گۆڕان توشی شكستی قورستر دەكەن، بۆیە تاكو زیاتر نەبم بە بەشێك لەو شكستە وەك ناڕەزاییەك دەست لەكاركێشانەوەی خۆم پێشكەش كردوە.
عەبدولڕەحمان موهەندیس باسی لەوەشكردوە: تاكو ئێستاش من لەگەڵ هاوڕێكانم لە فراكسیۆن بەیەكەوە كار دەكەین ئەوەی لە توانامدا بێت درێخی ناكەم، حزبێك نەتوانێت ریفۆرم و چاكسازی لەناوخۆی خۆیدا بكات حەتمەن ناتوانێت ریفۆرم و چاكسازی لەدەرەوەی خۆیدا بكات، ئەوانەی گۆڕانی ئێستا بەڕێوە دەبەن ئەگەر پابەندی پرەنسیپ و ئامانجەكانی جارانی گۆڕانن، پێویستە بەخۆیاندا بچنەوە و چیتر بزوتنەوە جەماوەریەكە گچكە و ناشیرین نەكەن.
