غەفوور ئەحمەد قایمقامی قەزای مێرگەسۆر ئاشكرایكرد: سەرۆكایەتی ئەنجومەنی وەزیرانی هەرێم رەزامەندیی بۆ دروستكردنی دەروازەی نێودەوڵەتی “زێت” لەگەڵ توركیا دەربڕیوە.
غەفوور ئەحمەد بە ماڵپەڕی فەرمی پارتی وتوە: هەوڵەكان بۆ كردنەوەی دەروازەی نێودەوڵەتی “زێت” بەردەوامن كە دەكەوێتە سنوری قەزای مێرگەسۆری پارێزگای هەولێر، سەرۆكایەتی ئەنجومەنی وەزیرانیش رەزامەندیی نیشان داوە بۆ دروستكردنی كۆمەڵگەی نێودەوڵەتی دەروازەكە و قیرتاوكردنی رێگا.
ئاماژەی بەوەشداوە: دیزاینێكی زۆر باش و بەپێی ستانداردی پێشكەوتو بۆ دەروازەی “زێت” كراوە و رێگاكەش لە سەنتەری ناحیەی شیروان مەزن تا سەر سنورە كە 13 كیلۆمەترە و قیرتاو دەكرێت.
قایمقامی قەزای مێرگەسۆر هێمای بۆ ئەوەشكردوە: لە ئایندەیەكی زۆر نزیكدا دەست بە جێبەجێكردنی پڕۆژەكە دەكرێت، تیمەكانی كاركردنیش چاوەڕێی گونجاویی رەوشی كەشوهەوای ناوچەكە دەكەن و لەگەڵ باشبونی كەشوهەوا دەست بە دروستكردنی كۆمەڵگەكە و قیرتاوكردنی رێگا دەكرێت.
