سەرۆكی ئەمریكا چەند كۆتوبەندێكی سەپاند بەسەر هێرشەكانی فڕۆكە بێفڕۆكەوانەكانی وڵاتەكەی دژ بە گروپە توندڕەوەكان.
جۆ بایدن سەرۆكی ئەمریكا لە لێدوانێكی رۆژنامەوانیدا رایگەیاند، نابێت لەدەرەوەی گۆڕەپانی جەنگەكان كە ویلایەتەیەكگرتوەكانی ئەمریكا گرتوێتیە ئەستۆی خۆی لە عێراق و سوریا و ئەفغانستان، فڕۆكەی بێفڕۆكەوان بۆ هێرش كردنە سەر گروپە توندڕەوەكان بەكار بهێنرێت.
لەكاتێكدا پێشتر دوناڵد ترامب سەرۆكی پێشوی ئەمریكا بەشێوەیەكی بەرفراوان رێگای بەمجۆرە هێرشانە دابو.
جۆن كێربی وتەبێژی وەزارەتی بەرگری ئەمریكا لەكۆنگرەیەكی رۆژنامەوانیدا رونیكردەوە، هەر جۆرە پلانێك بۆ لێدانی گروپە توندڕەوەكان لەدەرەوەی چوارچێوەی جەنگ لە ئەفغانستان و سوریا و عێراق داڕێژرابێت، ئەبێت كۆشكی سپی پەسەندی بكات.
وتیشی، ئەم بڕیارە هەتاهەتایی نیە و ئەوە ناگەیەنێت كە هێرشەكانمان لەرێگای فڕۆكەی بێفڕۆكەوانەوە رابگرین، بەڵكو سورین لەسەر هاوكاری كردنی هاوبەشە بیانیەكانمان بۆ روبەڕوبونەوەی هەڕەشەی رێكخراوە توندڕەوەكان.
