جێگری سەرۆكی هەرێمی كوردستان لەگەڵ كونسوڵی گشتی كۆماری ئیسلامی ئێران لە هەرێم كۆبوەوە و داوایەكی سەبارەت بە رێكەوتنی نێوان هەولێر و بەغدا ئاڕاستەی ئێران كرد.
مستەفا سەید قادر جێگری سەرۆكی هەرێم دوای ئەوەی لەهەولێر پێشوازی لە نەسروڵا رەشنودی كونسوڵی گشتی كۆماری ئیسلامی ئێران لە هەرێم كرد، كۆبونەوە و پرسە هەڵپەسێدراوەكانی نێوان هەولێر و بەغدایان تاوتوێی كرد، سەرەڕای گفتوگۆكردن لەسەر پەیوەندیە دوو قۆڵییەكانی هەرێمی كوردستان و ئێران لەسەر ئاستی سیاسی و ئابوری و ئەمنی.
مستەفا سەید قادر لەكۆبونەوەكەدا داوای لە كۆماری ئیسلامی ئێران كرد، لەسەر پرسە هەڵپەسێردراوەكانی نێوان هەولێر و بەغدا هەوڵەكانیان بخەنە گەڕ، بەمەبەستی گەیشتنیان بەرێكەوتن.
لەبەرامبەردا كونسوڵی گشتی كۆماری ئیسلامی ئێران لەهەرێم، سەقامگیری سیاسی هەرێمی كوردستان وعێراقی بۆ ئێران بە گرنگ لەقەڵەمدا.
