وەزیری كشتوكاڵی عێراق: هەرێم توانای كۆنترۆڵكردنی دەروازەكانی نییە

محەمەد خەفاجی وەزیری كشتوكاڵی عێراق پێی وایە: هەرێمی كوردستان توانای كۆنترۆڵكردنی دەروازە سنوریەكانی خۆی نییە و جەختلەوەشدەكاتەوە، ئەوان 90%ی دەروازە سنوریەكانی عێراقیان كۆنترۆڵ كردوە.
محەمەد خەفاجی لە گفتوگۆیەكی تەلەفزیۆنیدا باسی لەوەكردوە: هەرێمی كوردستان توانای ئەوەی نییە دەروازە سنوریەكانی خۆی كۆنترۆڵ بكات و رێگری لە بە قاچاخ هێنانی ئەو كاڵایانە بكات كە هاوردەكردنیان قەدەغە كراوە.
رونیشیكردوەتەوە: ئەوان 90%ی دەروازە سنوریەكانی عێراقیان كۆنترۆڵ كردوە و بەردەوامیش لە پەیوەندیدان لەگەڵا ئەفسەرانی دەروازەكان بۆ رێگریكردن لە قاچاخچێتی.
حكومەتی عێراق بەردەوام هەرێمی كوردستان تۆمەتبار دەكات بەوەی، ئەو كاڵایانەی هاوردەكردنیان قەدەغە كراوە و كاڵای ماوەبەسەرچو و خراپ لە دەروازە سنوریەكانیەوە دەهێنرێتە ناوەوە و بۆ ناوچەكانی تری عێراقیش دەنێردرێن.