وەزیری كۆچ و كۆچبەرانی عێراق ئاشكرای كرد، لەگەڵ پارێزگای سلێمانی كار بۆ ئامادەكردنی بەرنامەیەك دەكەن بۆ گەڕانەوەی ئاوارەكان بۆ ناوچەكانی خۆیان و سوپاسی خەڵكی سلێمانیشی كرد كە هاوكاری ئاوارەكانیان كردوە.
ئیڤان فایەق وەزیری كۆچ و كۆچبەرانی عێراق لەكۆنفرانسێكی رۆژنامەوانیدا رایگەیاند، ئامانجی سەردانی بۆ شاری سلێمانی لەماوەی چەند رۆژی رابردوودا، ئامادەكردنی بەرنامەیەكی كاری هاوبەش بوە لەنێوان هەردوو پارێزگای سلێمانی و سەڵاحەدین بۆ گەڕانەوەی ئاوارەكان بۆ ناوچەكانی خۆیان.
وتیشی، هەندێكجار لایەنی سیاسی كێشەمان بۆ دروستدەكەن، بەڵام ئێمە لە كارەكانمان بەردەوام دەبین و بەهەمان شێوە ئاوارەكانیش خواستی ئەوەیان هەیە بگەڕێنەوە شوێنی خۆیان، و سوپاسی گەلی كورد و بەتایبەتی دانیشتوانی سلێمانی دەكەن كە ژمارەیەكی زۆر ئاوارەیان لەتەواوی پێكهاتە جیاوازەكان لەخۆگرتوە و هاوكاریانكردوون.
