د.سەیوان عەلی بریكاری وەزارەتی پەروەردەی حكومەتی هەرێم دەڵێت: نامانەوێت بەهیچ شێوەیەك ئەمساڵی خوێندن بفەوتێت و قۆناغی 12 وەكو قۆناغەكانی تر بێت.
د.سەیوان عەلی سەبارەت بە پرۆسەی خوێندن بە دەنگی ئەمریكای وتوە: وەزارەتی پەروەردەی عێراقمان نەكردوە بەنمونەیەك بۆ ئەوەی لەسەر ئیشەكانی ئەوان بڕۆین چونكە ئێمە پرۆگرامی خۆمان و بۆچون و شێوەی كاركردنی خۆمان هەیە، بارودۆخی كوردستانیش تارادەیەكی زۆر جیاوازە لەبارودۆخی عێراق.
باسی لەوەشكرد: نامانەوێت بەهیچ شێوەیەك ئەمساڵی خوێندن بفەوتێت واتە قۆناغی 12 وەكو قۆناغەكانی تر بێت، هەرچەندە بەڕاستی ئەمساڵ زیانێكی زۆرمانكردوە لەمەسەلەی كات و خوێندن بەڵام نامانەوێت ساڵەكە بفەوتێت و تەنها خوێندكارەكان دەربچێنین و ببڕێتەوە.
بریكاری وەزارەتی پەروەردەی حكومەتی هەرێم جەختیلەوەشكردوەتەوە: نەك هەر لەكوردستاندا بەڵكو لەسەرتاسەری دنیادا كەس نازانێت ئەم ڤایرۆسە هەتا 25 ی مانگ چی لێ بەسەردێت؟ واتە ئایا گەشە دەكات یاخود دەبێت بەمەترسیەكی گەورە لەسەر كۆمەڵگەی كوردستان بەشێوەیەكی گشتی و لەسەر قوتابیان و مامۆستایان و دایك و باوكان، بەڵام لەپلانماندا بوە و لەپلانماندایە هەتا ئێستاش ساڵی خوێندن نەفەوتێت و دەوام بكرێت ئیتر بارودۆخەكەش چۆن دەبێت ئێمە نازانین.
