نوێترین هەواڵ

پەرلەمانی كوردستان داوایەك لە كۆمەڵگەی نێودەوڵەتی و رێكخراوە مرۆییەكان دەكات

سەرۆكایەتی پەرلەمانی كوردستان لە یادی كیمیابارانی هەڵەبجەدا داوا لە كۆمەڵگەی نێودەوڵەتی و رێكخراوە مرۆییە جیهانییەكان دەكات، ئەو تاوانە دژ بە ‌مرۆڤایەتییە بەجینۆساید بناسێنن.
سەرۆكایەتی پەرلەمانی كوردستان لە پەیامێكدا بەبۆنەی یادی 33 ساڵەی كیمیابارانی هەڵەبجە بڵاویكردوەتەوە: 16ی 3 لە ‌یادگە ‌و رۆژژمێری گەلەكەماندا برینێكە هەرگیز ساڕێژ نابێت و لەویژدانی هەمو كوردێكدا ئازارێكی قوڵ و بێكۆتایە، لاپەڕەیەكی رەشە لەمێژوی حوكمڕانی رژێمی بەعسی لەناوچو، ئەم تاوانە دژ بەمرۆڤایەتیەش بەتەنها بەرامبەر گەلەكەمان نەكراوە، بەڵكو تاوانێكە بەرامبەر ‌مرۆڤایەتی، هاوشێوەی هیرۆشیماو ناكازاكی و هۆلۆكۆستە.
ئەوەش هاتوە: داواكارین لە كۆمەڵگەی نێودەوڵەتی و رێكخراوە مرۆییە جیهانییەكان، ئەم تاوانە دژ بە ‌مرۆڤایەتییە بەجینۆساید بناسێنن، بۆئەوەی لەهیچ كونجێكی جیهاندا جارێكی تر دوبارە نەبێتەوەو گەلی كوردستانیش لەهەر هەرەشەیەكی لەوجۆرە بپارێزن.
سەرۆكایەتی پەرلەمان جەختیلەوەشكردوەتەوە: هەروەها پێویستە لەسەر حكومەتی عێراقی فیدراڵ كار بە بڕیاری دادگای باڵای تاوانەكان و مادەی 132 لە دەستوری عێراق بكات بۆ قەرەبوكردنەوەی كەسوكاری شەهیدان و قوربانیانی هەڵەبجە، ئەركی ئەنجومەنی نوێنەرانیشە یاسایەكی تایبەت بەجینۆسایدناساندنی گەلی كوردستان دەربكات و تێیدا مافی كەسوكاری شەهیدان و قوربانییان بچەسپێنرێت، لەپێناو قەرەبوكردنەوەی زیانە مادی و مەعنەوییەكانیان و ئەو زەبرە دەرونییەی بەریان كەوتوە.

……………..
پەیامی سەرۆكایەتیی پەرلەمان لەساڵیادی كیمیابارانكردنی هەڵەبجەدا
سەرۆكایەتیی پەرلەمان: “3/16 لەیادگەو ڕۆژژمێری گەلەكەماندا برینێكە هەرگیز ساڕێژ نابێت”
كەسوكاری سەربەرزی شەهیدانی هەڵەبجە، هەورامان و شارەزوور..
جەماوەری كوردستان..
ئەمڕۆ 2021/3/16، سی و سێ ساڵ تێدەپەڕێت بەسەر كیمیابارانكردن و كۆمەڵكوژیی شاری هەڵەبجەی زامدار.
3/16، لەیادگەو ڕۆژژمێری گەلەكەماندا برینێكە هەرگیز ساڕێژ نابێت و لەویژدانی هەموو كوردێكدا ئازارێكی قووڵ و بێكۆتایە، كیمیابارانكردنی هەڵەبجەو هەورامان و شارەزوورو دێهاتەكانی دەوروبەریان، لاپەڕەیەكی ڕەشە لەمێژووی حوكمڕانێتیی ڕژێمی بەعسی لەناوچوو، ئەم تاوانە دژ بەمرۆڤایەتییەش بەتەنها بەرامبەر ڕۆڵەكانی گەلەكەمان نەكراوە، بەڵكو تاوانێكە بەرامبەر ‌مرۆڤایەتی، هاوشێوەی هیرۆشیماو ناكازاكی و هۆلۆكۆستە، بۆیە لەم یادە خەمناكەدا جارێكی تر ئەنجامدەرانی ئەم تاوانە گەورەیە ڕیسواو مەحكوم و شەرمەزار دەكەین، هاوكات داواكارین لەكۆمەڵگەی نێودەوڵەتی و ڕێكخراوە مرۆییە جیهانییەكان، ئەم تاوانە دژ بەمرۆڤایەتییە بەجینۆساید بناسێنن، بۆئەوەی لەهیچ كونجێكی جیهاندا جارێكی تر دووبارە نەبێتەوەو گەلی كوردستانیش لەهەر هەڕەشەیەكی لەوجۆرە بپارێزن.
هەروەها پێویستە لەسەر حكومەتی عێراقی فیدڕاڵ، كار بەبڕیاری دادگای باڵای تاوانەكان و مادەی 132 لەدەستووری عێڕاق بكات بۆ قەرەبووكردنەوەی كەسوكاری شەهیدان و قوربانیانی هەڵەبجە، ئەركی ئەنجوومەنی نوێنەرانی عێراقیشە یاسایەكی تایبەت بەجینۆسایدناساندنی گەلی كوردستان دەربكات و تێیدا مافی كەسوكاری شەهیدان و قوربانییان بچەسپێنرێت، لەپێناو قەرەبووكردنەوەی زیانە مادی و مەعنەوییەكانیان و ئەو زەبرە دەروونییەی كەبەریان كەوتووە.
لێرەدا دووپاتی دەكەینەوە كە پێویستە ئاوڕێكی جدی لە كەسوكاری قوربانیان بدرێتەوەو حكومەتی هەرێمی كوردستان هەوڵەكانی چڕ بكاتەوە بۆ خزمەتكردنی زیاتری كەسوكاری قوربانیان و چارەسەركردنی بەركەوتووانی چەكی كیمیاوی و گەڕان بەدوای ونبووەكانی ئەم تراژیدیا مرۆییە كەموێنەیەو دابینكردنی بودجەو شایستەی دارایی پێویست بۆ پارێزگای هەڵەبجە، هاوشێوەی پارێزگاكانی تری هەرێمی كوردستان.
وەك پەرلەمانی كوردستانیش بەئەركی سەرشانی خۆمانی دەزانین كەپاڵپشتیی تەواوی داواكارییەكانی خەڵكی بەشمەینەتی هەڵەبجەو ناوچە زیانلێكەوتووەكانی دەوروبەری بین و پەرلەمانتاران بەگشتی و پەرلەمانتارانی سنووری هەڵەبجەو لیژنە تایبەتمەندەكانیش ڕادەسپێرین كە بەردەوامبن لەچاودێریكردنی ڕەوشی بەرەوپێشەوەچوونی شارەكە لەسەر ئاستی تەندروستی، پەروەردەو فێركردن و ڕۆشنبیری، خزمەتگوزارییە گشتییەكان، هاوكات بەدواداچوونی بەردەوام بۆ كێشەو گرفتەكانیان بكەن و لەگەڵ دامودەزگاكانی حكومەتدا بەدەنگ ویست و داخوازی و جێبەجێكردنی داواكانیانەوە بچن.
نەمری بۆ شەهیدانی مەرگەساتی كیمیابارانكردنی هەڵەبجەو سەرجەم شەهیدانی كوردو كوردستان.
سەرۆكایەتیی پەرلەمانی كوردستان
2021/3/16

هەواڵی دواتر

مباپێ‌: چیتر لەوە زیاتر چاوەڕێ ناكەم

كیلیان مباپێ‌ ئەستێرەی هەڵبژاردەی فەرەنسا و یانەی پاریس سانجێرمانی هەمان وڵات جەخت لەوە دەكاتەوە، چیتر …

وەڵامێک بنووسە

پۆستی ئەلکترۆنیکەت بڵاو ناکرێتەوە .