ئیخڵاس دلێمی ئەندامی پەرلەمانی عێراق لەسەر پشكی فراكسیۆنی پارتی دەڵێت: هۆكاری بایكۆتكردنی دانیشتنەكەی پەرلەمان لەسەر یاسای دادگای فیدراڵی رێگرتنە لە دوبارەكردنەوەی تەجروبەی ئێران و ناكرێت شەرعزانەكان مافی ڤیتۆیان هەبێت.
ئیخڵاس دلێمی لە لێدوانێكی رۆژنامەوانیدا باسی لەوەكردوە: كاتێك لەگەڵ هەندێك هێزی سیاسی جیاواز لە سونە و شیعە و هێزە مەدەنییەكان و كەمە ئایینیەكان دانیشتنی رۆژی سێشەممەیان كە تایبەت بوو بە دەنگدان لەسەر یاسای دادگای فیدراڵی بایكۆت كرد، ئامانج رێگەگرتن بوو لە دووباربونەوەی تەجروبەی ئێران لە دادگادا، ئەویش بەوەی شەرعزانە ئیسلامیەكان لە دانانی بڕیارە چارەنوسسازەكاندا هەبن.
رونیشیكردوەتەوە: لەئێستادا كار دەكەین بۆ گەرەنتیكردنی جێبەجێكردنی یاساكان لە چوارچێوەی كاری دادگای فیدراڵیدا، ئەوەش بۆ پاراستنی مافەكانی گەلی عێراق بەسەرجەم تاییفە و پێكهاتەكانەوە.
دلێمی باسی لەوەشكردوە: ناكرێت مافی ڤیتۆ بدرێت بە شەرعزانە ئیسلامیەكان، ئەوەشی سەبارەت بە ترس لە دەركردنی بڕیارەكانی دادگای فیدراڵی كە پێچەوانەی شەرعی ئیسلام بێت دەوترێت لە بنەڕەتدا ئەو ترسە بونی نییە، چونكە دەستور بە ئاشكرا رێگری لە تێپەڕاندنی هەر یاسایەك دەكات كە پێچەوانەی شەریعەتی ئیسلامی بێت.
