فراكسیۆنی پارتی لە پەرلەمانی كوردستان راگەیەندراوێكی لەبارەی تەقەكردن لە بارەگاكانی ئەو حزبە رایگەیاند، بەردەوامیدان بەو كارە دور لە پرەنسیپ و بێ بەهایە ئاكامێكی باشی نابێت، دەشڵێت، “داوا سەرجەم دەزگا ئەمنییەكان دەكەین بە ئەركی خۆیان هەستن و ئەوان بەرپرسن لە ڕێگریكردن لەم كارە دزێوە”.
فراكسیۆنی پارتی لە پەرلەمانی كوردستان لەراگەیەندراوێكدا بڵاویكردەوە، “جارێكی دیكە دەستێكی ترسنۆك لقی دوانزەی پارتی لە شاری هەڵەبجە دایە بەر دەستڕێژی گوللە، تەقەكردن لەبارەگای لقی 12ی پارتیمان لە هەڵەبجەی شەهید بەهۆی ئەو ئەو بێ باكییەیە كە دەزگا ئەمنییەكان لە سنورەكەدا هەمو جار بەرانبەر تەقەكەران دەینوێنن و تا ئێستا هیچ هەنگاوێكی كرداریان نەهاوێشتوە بۆ بە سزاگەیاندنی تەقەكەرەكان و ئەوانەی لەپشتیانن”.
باسی لەوەشكردووە، تا ئێستا لەهەڵەبجەو سلێمانی و گەرمیان و ڕاپەڕین و چەند ناوچەیەكی دیكەش زیاتر لە 70 جار تەقە لە بارەگاكانی پارتی كراوەو كەس دەستگیرنەكراوە، “ئەمەش جدییەتی هێزە ئەمنییەكان لە سنوری پارێزگای سلێمانی و ھەلەبجە دەخاتە ژێر پرسیار بۆ دەستگیركردنی تۆمەتباران”.
فراكسیۆنی پارتی دەشڵێت، “بەردەوامیدان بەم كارە دور لە پرەنسیپ و بێ بەهایە ئاكامێكی باشی نابێت، بۆیە داوا سەرجەم دەزگا ئەمنییەكان دەكەین بە ئەركی خۆیان هەستن و ئەوان بەرپرسن لە ڕێگریكردن لەم كارە دزێوە، وەكو فراكسێۆنی پارتی بەدواداچونی پەرلەمانی دەكەین و دەبێت ئاستێك بۆ ئەم دەستدرێژییانە دابنرێ و لایەنی كەمتەرخەم روبەروی لێپێچینەوەی یاسایی بكرێ”.
