له‌ڕوداوێكى ته‌قه‌كردندا 10 كه‌س له‌ئه‌مریكا كوژران

ده‌سه‌ڵاتدارانى ئه‌منى ئه‌مریكا ڕایانگه‌یاند، له‌هێرشێكدا له‌ناو ناوه‌ندێكى بازرگانى له‌ شارى بولدیر له‌ویلایه‌تى كولورادۆ، به‌لایه‌نى كه‌مه‌وه‌ 10 كه‌س كوژران.
ده‌سه‌ڵاتدارانى ئه‌منى ئه‌مریكا له‌كۆنگره‌یه‌كى رۆژنامه‌وانیدا له‌سه‌ر هێرشه‌كه‌ ڕایانگه‌یاند، یه‌كێك له‌كوژراوه‌كان پۆلیسه‌ و هێزه‌كانى پۆلیس كه‌سێكیان به‌بریندارى ده‌ستگیركرد، كه‌ گومانى لێده‌كرێت هێرشبه‌ره‌كه‌ بێت.
هێزه‌كانى پۆلیس ورده‌كارى ڕوداوه‌كه‌یان باس نه‌كرد كه‌ له‌ ماركێتێكى فرۆشتنى سه‌وزه‌ و میوه‌ له‌ناوچه‌ى تیبل میسا ڕویداوه‌، له‌كاتێكدا پێشتر پولیسى بولدیر ڕایگه‌یاندبو، هێزه‌كانیان ده‌ستبه‌جێ گه‌یشتونه‌ته‌ شوێنى ڕوداوه‌كه‌ و یه‌كه‌یه‌كى زۆرى پیاوانى ئاسایش له‌و شوێنه‌ بڵاوه‌یان پێكراوه‌ .