دەستەی ناوخۆیی سەربە ئیدارەی سەربەخۆ لە باكوری رۆهەڵاتی سوریا بە هاریكاری لەگەڵا ناوەندی سوریی بۆ لێكۆڵینەوەكان، ناوەندێكی هاوبەشی پزیشكی لە دەروازەی سیمێڵكای سنوریی لەگەڵ هەرێمی كوردستان كردەوە.
سەمەر حسێن هاوسەرۆكی دەستەی ناوخۆیی لە باكوری رۆژهەڵاتی سوریا لە لێدوانێكی رۆژنامەوانیدا وتی: وەك سەرجەم وڵاتانی تر ماوەی زیاتر لە ساڵێكە ناوچەكەمان بەدەست پەتای كۆرۆناوە دەناڵێنێت و ئیدارەی سەربەخۆ هەمو هەوڵێكی خستوەتە گەڕ بۆ سنورداركردنی بڵاوبونەوەی ڤایرۆسەكە و كەمكردنەوەی توشبوان بەپێی توانا.
رونیشیكردوەتەوە: هەمیشە هەوڵی ئەوە دەدەین ئارامی و سەقامگیری لەناوچەكانمان بچەسپێنین و هەروەها خۆمان بە بەرپرس دەزانین لە پاراستنی تەندروستی و سەلامەتی هاوڵاتیانمان بەتایبەتی لەكاتی ئەم پەتایەدا.
سەبارەت بە كردنەوەی خاڵە پزیشكیەكە باسی لەوەكرد: خاڵێكی پزیشكی لە دەروازەی سیمێڵكای سنوریی بە هاریكاری نێوان دەستەی ناوخۆیی و ئیدارەی هێزی ئەمنی ناوخۆیی لەگەڵ ناوەندی سوریی بۆ لێكۆڵینەوەكان كرایەوە، ئەوەش بۆ پشكنینی پزیشكی بۆ هەمو ئەوانەی دێنە ناوچەكانمان لەو دەروازە سنورییەوە.
