گروپی چەكداریی رەبعەڵڵا لە شەقامەكانی بەغدا بڵاوبونەوە و نامەیەكی هەڕەشە ئامێزیان خوێندەوە و داواش دەكەن پشكی هەرێمی كوردستان لە پرۆژە یاسای بودجە نەدرێت و پشتگیری هەوڵەكانی دابەزاندنی نرخی دۆلاریش دەكەن.
گروپی چەكداریی رەبعەڵڵا لە شەقامەكانی شاری بەغدا بڵاوەیانكرد و لە بەیاننامەیەكدا ئاماژەیان بەوەدا: دەستی ئەو ئەندامانەی پەرلەمان دەگوشن كە داوای دابەزینی نرخی دۆلار بەرامبەر دینار دەكەن و دەنگیان دەخەنە پاڵ دەنگی ئەوان بۆ سەرخستنی هەژاران و بەشخوراوان، كە زۆرینەی رۆڵەكانی گەل پێكدەهێنن.
ئەوەش هاتبو، هۆشداری دەدەنە هەندێك لایەنی سیاسی كە بە ئەنقەست بودجە دوادەخەن و پەسەندكردنی پەكدەخەن لە پێناو بەرژەوەندی تایبەت، هۆشداریشیان داوە لە پێدانی بەشە بودجە بە هەرێمی كوردستان.
گروپی رەبعەڵڵا جەخت لەوەدەكاتەوە لەسەر هەموو لایەنە سیاسیەكانی نێو حكومەت پێویستە ئەوە بزانن كە بێدەنگیان درێژە ناكێشت ئەگەر داواكارییەكانی گەلی عێراق بەتایبەتی پارێزگاكانی باشوور جێبەجێ نەكرێت لە پرۆژەیاسای بودجەدا.
