هاوڵاتیانی عێراق لەماڵەوە ڤاكسینی دژی كۆرۆنا وەردەگرن

وەزیری تەندروستی عێراق رایگەیاند، لەگەڵ گەیشتنی پێكوتەی دژە ڤایرۆسی كۆرۆنا بەسەر هەمو پارێزگاكانی عێراقدا دابەشدەكرێت و دەڵێت: تیمەكانی تەندروستی بەسەر ماڵەكاندا دەگەڕێن بۆ كوتینی هاوڵاتیان.
حەسەن تەمیمی وەزیری تەندروستی عێراق لە لێدوانێكی رۆژنامەوانیدا رایگەیاند، دوای ئەوەی كۆبونەوەیەكی بەرفراوانیان لەوەزارەتەكە ئەنجامداوە بەمەبەستی كوتینی هاوڵاتیان بە پێكوتەی دژە كۆرۆنا، بڕیاریاندا لەگەڵ گەیشتنی پێكوتەكە بەسەر هەمو پارێزگاكاندا دابەشی بكەن و تیمەكانی تەندروستی بەسەر گەڕەكەكاندا بگەڕێن و لەماڵەوە هاوڵاتیان بكوتن.
رونیشیكردەوە، لەكۆبونەوەكەدا باسیان لەچۆنێتی پێدانی ژەمە ڤاكسینەكان كردوە و بەگرنگیان زانیوە بەمەبەستی كوتانی زۆرترین ژمارەی هاوڵاتیانی عێراق بەپێكوتەی دژەكۆرۆنا، تیمەكانی تەندروستی سەردانی وەزارەت و دامەزراوەكان بكەن.
پێشتر سامان بەرزنجی وەزیری تەندروستی حكومەتی هەرێمی كوردستان ئاشكرای كرد، لەو 336 هەزار ژەمە ڤاكسینەی كە بڕیارە بگاتە عێراق، 43 هەزاری  پشكی هەرێمی كوردستانە ‌و بەپێی ڕێنمایەكان دەست بە ‌دابەشكردنی دەكرێت.