سایلۆی سلێمانی لە راگەیەنراوێكدا ئاشكرایكرد، رۆژی دووشەممە 29ی ئازاری 2021 چەكی پارەی گەنمی جوتیاران دابەش دەكرێت.
سایلۆی سلێمانی لە راگەیەنراوێكدا ئاماژەی بەوەداوە: ئەو جوتیارانەی رۆژی 30ی حوزەیرانی 2020 گەنمیان رادەستی سایلۆی سلێمانی كردوە، رۆژی دووشەممە 29ی ئازاری 2021 ژمارە كارتی 958 سەردانی هۆبەی ژمێریاری بەڕێوەبەرایەتیەكەیان بكەن بە مەبەستی وەرگرتنی چەكی پارەكانیان.
رونیشكراوەتەوە: بەهۆی سەرقاڵی بانكەكان بە دابەشكردنی موچەی فەرمانبەران، داواكارن رۆژی یەكشەممە 28ی ئازاری 2021 سەردانیان نەكەن بۆ وەرگرتنی چەك، چونكە چەك دابەش ناكرێت، هەروەها ئەو جوتیارانەی لە ساڵەكانی 2014 و 2015 و 2016 گەنمیان ڕادەستی سایلۆكان كردوە وەكالەتیان بۆ كراوەتەوە وەكالەتەكانیان تازە بكەنەوە بۆ ساڵی 2021.
سایلۆی سلێمانی هێمای بۆ ئەوەشكردوە: ئەو كەسانەی كە كۆچی دواییان كردوە لە رێگەی دادگاكانەوە “قەسام قانونی” دەربێنن و وەكالەت بۆ یەكێك لە وارسەكانیان بكەنەوە بەمەبەستی وەرگرتنی چەكی پارەی ئەو شایستە داراییانەی كە بۆیان دیاریكراوە.
