لیژنەی كاروباری پێشمەرگەی پەرلەمانی كوردستان ئاشكرای كرد، بەهۆی كێشەیەكی تەكنیكیەوە زیاتر لەدوو مانگە لیوا هاوبەشەكانی پێشمەرگە موچەیان بۆ خەرج نەكراوە.
لیژنەی كاروباری پێشمەرگەی پەرلەمانی كوردستان لەراگەیەندراوێكدا بڵاویكردەوە، بەهۆی كێشەیەكەوە لەهەژماری بانكی و گواستنەوە تاوەكو ئێستا پارەی موچەی لیوا هاوبەشەكان لەئەمریكاوە نەگەیشتوەتە هەرێم و دابەشنەكراوە و كاتەكەی دواخراوە و زیاتر لە دوو مانگە موچەیان بۆ خەرج نەكراوە.
هێمای بۆ ئەوەشكرد، لیژنەی كاروباری پێشمەرگە لە ناوەڕاستی ئەم مانگەوە بەنوسراوی فەرمی داوای لەلایەنی پەیوەندیدار كردوە پارە بۆ وەزارەتی پێشمەرگە دابین بكرێت تاوەكو موچە دابەش بكرێت بەسەر ئەم هێزانە و داوایكرد، مانگانە لەگەڵ فەرمانبەرانی حكومەت موچەكە وەربگرن.
پێشتر لیوا قارەمان كەمال جێگری سوپاسالاری هێزەكانی پێشمەرگە رایگەیاند، وەزیری پێشمەرگە بەفەرمی داوای لەحكومەتی هەرێم كردوە، بەقەرز موچەیەك بدات بەو لیوا هاوبەشانە تاوەكو پارەكەی هاوپەیمانان دەگات، بەڵام تا ئێستا وەڵام نەدراونەتەوە.
