ئەندامێكی كوردی پەرلەمانی عێراق پێی وایە، دۆسێی بەشە بودجەی هەرێم زۆر ئاڵۆزە و شاندی حكومەتی هەرێمی كوردستانیش خاوەن بڕیار نیە.
یوسرا رەجەب ئەندامی پەرلەمانی عێراق لەفراكسیۆنی هیوا لەلێدوانێكی رۆژنامەوانیدا بەدوری زانی دانیشتنی پەرلەمان لەسەر بودجەی گشتی 2021ی عێراق ئەنجامبدرێت و وتی، تاوەكو ئێستا رێكەوتنێكی كۆتایی نیە لەبارەی دەنگدان لەسەر بودجە و رێكەوتن لەسەر چەندین بابەت نەكراوە كە بونەتە لەمپەڕ لەبەردەم بەستنی دانیشتنی پەرلەمانی عێراق بۆ دەنگدان لەسەر بودجە.
رونیشیكردەوە، بەتەنها بەشە بودجەی هەرێم نەبوەتە رێگر لەبەردەم پەسەندكردنی بودجەی عێراق بەڵكو خاڵی ناكۆكی تریش زۆرە بۆ تێپەڕاندنی، بەڵام دۆسێی بەشە بودجەی هەرێم ئاڵۆزییەكی زۆری تێدایە و شاندەكەی هەرێمیش خاوەن بڕیار نیە.
