د.رەهێڵ فەرەیدون بریكاری وەزارەتی تەندروستی دەڵێت: ئەگەر بارودۆخ بەو شێوەیە بڕوات ئەوا لێدانی زەنگی مەترسی زۆر نزیكە و ئەگەری هەیە كەرەنتینەی نیمچەیی رابگەیەندرێت.
د.رەهێڵ فەرەیدون بە دەنگی ئەمریكای وتوە: لە كۆبونەوەكانی لیژنە‌ی باڵای روبە‌ڕوبونە‌وە‌ی كۆرۆنا پێشنیازی ئە‌وە‌مانكرد بە‌دە‌ر لە‌خۆپارێزی بۆ بە‌رگرتن لە‌بڵاوبونە‌وە پێویستە بە‌ر لە‌سە‌رچاوە‌كە بگیرێت، پێمانوابو سە‌رچاوە‌كە لە‌هاوڵاتیانی ناوە‌ڕاست و باشوری عێراقە‌وە‌یە بۆیە هە‌رزوو كۆمە‌ڵێك پێشنیار و ئە‌گە‌رمان خستە بە‌ردە‌م لیژنە‌ی باڵا، بە‌ڵام سە‌رە‌تا بە‌هۆی ئە‌و كێشە ئابوریانە‌ی لە‌كوردستان و كەرتی گە‌شتیاری هەیە نە‌چونە ژێرباری، ئە‌مە هۆكارێك بوو لە‌هۆكارە سە‌رە‌كییە‌كان.
باسی لەوەشكردوە: هۆكارێكی دیكە‌ش ئە‌وە‌بو بە‌بە‌ردە‌وامی بینیمان هاوڵاتیان زۆر كە‌متە‌رخە‌من یاخود تاڕادە‌یە‌كی زۆر پێیان وایە ئەم كۆرۆنایە تە‌واو بوە و ئە‌وە‌شی هەیە مە‌ترسیدار نییە و بە‌س قسە‌یە و هە‌رلایە‌ك بە‌شێوازێك بۆیە بە‌ڕاستی ئە‌مە‌ش وایكرد لە‌گە‌ڵ سە‌رچاوە‌كە‌دا زۆر خێرا ژمارە‌كان رۆژ بە رۆژ زیادبكات.
سەبارەت بەئەگەری راگەیاندنی قەدەغەی هاتوچۆ د.رەهێڵ وتویەتی: مە‌رج نییە كەرەنتینەی تە‌واوە‌تی رابگەیەنرێت لە‌م قۆناغە‌دا، بە‌ڵام ئەگەر بارودۆخە‌كە وە‌كو ئێستا بە‌ردە‌وام بێت ئەوا لێدانی زەنگی مەترسی زۆر نزیكە، من دڵنیام ناچاردە‌بین كەرەنتینەی نیمچەیی جارێكی تر بڕیاری لێبدرێتە‌وە.
