حامد موسه‌وى ئه‌ندامى په‌رله‌مانى عێراق له هاوپه‌یمانى فه‌تح پێى وایه: مسته‌فا كازمى سه‌رۆك وه‌زیران ده‌یه‌وێت ئابوریى عێراق له كۆت و به‌ندى ئه‌مریكادا بهێڵێته‌وه و هۆشداریش ده‌دات له‌وه‌ى نرخى 100 دۆلار ده‌گاته 160 هه‌زار دینار.
حامد موسه‌وى له لێدوانێكى رۆژنامه‌وانیدا باسى له‌وه‌كردوه: كازمى ده‌یه‌وێت ئابوریى عێراق كۆت و به‌ندى ئابوریى ده‌وڵه‌ته گه‌وره‌كانى جیهان بێت له پێشیشیانه‌وه ولایه‌ته یه‌كگرتوه‌كانى ئه‌مریكا.
رونیشیكردوه‌ته‌وه: وه‌رگرتنى پۆستى سه‌رۆك وه‌زیرانیش له چوارچێوه‌ى ئه‌و گرێبه‌سته‌دا بوو، هه‌روه‌ها هاوپه‌یمانى سائرون و حیكمه كاریگه‌رى گه‌وره‌یان له‌سه‌ر بڕیاره‌كانى مسته‌فا كازمى هه‌یه.
ئه‌و په‌رله‌مانتاره پێشى وایه: نرخى 100 دۆلارى ئه‌مریكى به‌رز ده‌بێته‌وه بۆ 160 هه‌زار دینار ئه‌گه‌ر ده‌ست به نرخى ئێستاوه نه‌گیردرێت، ئه‌و سیاسه‌تانه‌ى بانكى ناوه‌ندى په‌یڕه‌ویان ده‌كات هه‌ڵه‌یه و له‌ژێر كاریگه‌رى سیاسه‌ته‌كانى سنودقى نه‌ختینه‌ى نێوده‌وڵه‌تییه.
