ئەنجومەنی وەزیرانی عێراق بڕیاریدا بەمەبەستی هاوردەكردنی بڕێكی زیاتر لە ڤاكسینی كۆرۆنا زیاتر لە هەشت ملیۆن دۆلار بۆ وەزارەتی تەندروستی تەرخان بكات.
ئەمیندارێتی گشتی ئەنجومەنی وەزیران لەڕاگەیەندراوێكدا بڵاویكردەوە ئەنجومەنی وەزیران رەزامەندی لەسەر ژمارەیەك راسپاردەی وەزارەتی تەندروستی و ژینگە دەڕبڕی لەبارەی بەرەنگاربونەوەی پەتای كۆرۆنا لەنێویشیاندا كڕینی ڕێژەیەكی زیاتر لەڤاكسینی كۆمپانیای فایزەر.
راشیگەیاندووە، كە بڕیاردراوە وەزارەتی دارایی بڕی هەشت ملیۆن و 126 هەزار و 820 دۆلار بۆ وەزارەتی تەندروستی تەرخانبكات، بۆ هاوردەكردنی ژەمی یەكەم لەڤاكسینی كۆمپانیای فایزەر بەبڕی سێ ملیۆن دۆلار لەگوژمەی وەزارەتەكەی بۆ مانگەكانی داهاتو.
ئاماژەی بەوەشكردوە، خەرجكردنی ئەو بڕە پارەیە لەبەرژەوەندی وەزارەتی تەندروستی دەبێت لەگەنجینەی بانكی نێودەوڵەتی بۆ پرۆژە پەككەوتوەكانی لەعێراق، لەسەر بەهای دوو دۆلار وەك پێشەكییەك بۆ هەر ژەمێك لەڕێككەوتننامەكە دەدرێت، لەگەڵ بڕی 5.1 ملیۆن دۆلار لە بەرامبەر بڕی زیاتر له 512 هەزار ژەم لەكاروانی یەكەمی ڤاكسین وەك لە ڕێككەوتننامەكەدا هاتوە.
