بەڕێوەبەرایەتیی هاتوچۆی سلێمانی رایگەیاند، هەر شۆفێرێك سەرنشینی لەگەڵدا بێت و ماسك نەبەستێت، سزای دارایی دەدرێت، بڕی سزای هەر سەرنشینێكیش بە 20 هەزار دینار دیاریكراوە.
30ی ئازاری ئەمساڵ لیژنەی باڵای بەرەنگاربونەوەی ڤایرۆسی كۆرۆنا كۆبوەوە و چەند بڕیارێكی نوێی بۆ بەرەنگاربونەوەی ڤایرۆسی كۆرۆنا دەركرد.
لەبەیانی ژمارە 12ی ساڵی 2021 و لە خاڵی سیازدەیەمدا هاتوە شۆفێری ئۆتۆمبێلەكان بەهەمو جۆرەكانیەوە (تایبەت، بارهەڵگرو كرێ) لەكاتی هەبونی سەرنشین لەگەڵیاندا پێویستە شۆفێر و سەرنشین پابەند بن بە بەستنی ماسك، بەپێچەوانەوە بڕی بیست هەزار دینار بۆ هەر سەرنشینێك، شۆفێر وەك پێبژاردن بڕی سزاكە دەدات.
بەڕێوەبەرایەتی هاتوچۆی سلێمانی ئاماژەی بەوەكردوە، وەك لایەنی جێبەجێكار ئەم بڕیارە جێبەجێدەكات و لە 1-4-2021 تا 3-4-2021 ڕێنمایی دەدرێتە شۆفێران بە بەستنی ماسك لە دوای ئەو ماوەیە هەر شۆفێرێك سەرپێچی بكات سزا دەدرێت.
