ره‌فعه‌ت سمۆ جێگری پارێزگاری موسڵ پێى وایه: تا ئێستا په‌كه‌كه و هێزه ناشه‌رعیه‌كان له شنگال ماون و ده‌رنه‌چون، چونكه حكومه‌تی عێراق جدی نییه له ده‌ركردنی ئه‌و هێزانه.
ره‌فعه‌ت سمۆ به ماڵپه‌ڕی فه‌رمی پارتی وتوه: ئه‌و مۆڵه‌ته‌ی حكومه‌تی عێراق دابوى به په‌كه‌كه و هێزه ناشه‌رعیه‌كان بۆ ده‌رچونیان له شنگال جێبه‌جێ نه‌كرا و مۆڵه‌ته‌كه‌ش ته‌واو بو، بۆ ئه‌وه‌ی په‌كه‌كه پێویسته حكومه‌تی عێراق جدی بێت و بڕیارێكی یه‌كلاكه‌ره‌وه بدات.
باسى له‌وه‌شكردوه: چه‌ندین هێز له شنگال هه‌ن كه ناشه‌رعین و دۆخی شنگالیش زۆر خراپه و پێویسته هه‌رچۆنێك بێت حكومه‌تی عێراق بڕیارێك بدات و ئه‌و هێزانه ده‌ربكات، چونكه ناكرێت دۆخه‌كه به‌و شێوه‌یه به‌رده‌وام بێت.
جێگری پارێزگاری موسڵ ئه‌وه‌شى رونكردوه‌ته‌وه: تا ئێستا هێزه ناشه‌رعییه‌كان ئاماده نین شنگال چۆڵ بكه‌ن و به ناوی خه‌ڵكی شنگاله‌وه قسه ده‌كه‌ن، خه‌ڵكی ئه‌و ناوچه‌یه پشتگیرییان ناكات و داوای ده‌رچونیان ده‌كه‌ن، بۆیه پێویسته حكومه‌تی عێراق ئه‌وه له به‌رچاو بگرێت و ده‌ریان بكات و چیتر رێگه نه‌دات له شنگال بمێننه‌وه و دۆخی ناوچه‌كه ئاسایی بكرێته‌وه.
