wazho.net
مه‌سرور بارزانی، سه‌رۆكی حكومه‌تی هه‌رێمی كوردستان، له كۆنگریه‌كی رۆژنامه‌وانی، ئه‌مڕۆ چوارشه‌ممه (7ی نیسان/ ئه‌پرێلی 2021) رایگه‌یاند، په‌سندكردنی بودجه‌ی (2021) هه‌نگاوێكی گرنگه بۆ هه‌رێمی كوردستان.
مه‌سرور بارزانی گوتی: “ئێمه پابه‌ندبوونی خۆمان به حكومه‌تی فیدراڵی راده‌گه‌یه‌نین و چاوه‌ڕێش ده‌كه‌ین حكومه‌تی فیدراڵی پابه‌ندی خۆیان به پشكی هه‌رێمی كوردستان رابگه‌یه‌نن”.
گوتیشی: “داوا له حكومه‌تی عێراق ده‌كه‌ین، ئه‌و سێ مانگه‌ی كه رۆیشتووه مه‌قاسه بكرێت، بزانرێت كێ چه‌ندی ده‌كه‌وێته سه‌ر، ئێمه له پێش چاوی رای گشتی عێراقی و كوردستانی و جیهانی ده‌ڵێین حكومه‌تی هه‌رێمی كوردستان ئاماده‌یه هه‌موو پابه‌ندییه‌كانی خۆی جێبه‌جێ بكات، ده‌مانه‌وێت خه‌ڵك خۆی حه‌كه‌م بێت بزانێت حكومه‌تی هه‌رێم جێبه‌جێی كردووه، هیوادارین حكومه‌تی عێراقیش به‌و جۆره كار بكات كه به هه‌مان ئاراسته و نه‌فه‌س بێت”.
مه‌سرور بارزانی ئاشكرای كرد، “حكومه‌تی فیدراڵی مولزه‌مه به جێبه‌جێكردنی ناردنی شایسته داراییه‌كان، له سه‌ره‌تاوه‌ش “سه‌رۆك بارزانی” له‌سه‌ر هێڵ بووه له‌گه‌ڵ به‌رپرسان، ئه‌وه‌ش هۆكاربووه بۆ رێككه‌وتنه‌كه، ئه‌وه‌ش ده‌ستكه‌وتێكه بۆ هه‌موو خه‌ڵكی كوردستان و عێراقیش”.
