روپاك ئەحمەد وەرتی ئەندامی پەرلەمانی كوردستان لە فراكسیۆنی كۆمەڵی دادگەری دەڵێت: پارتی و یەكێتی كاتێك بیانەوی خەڵك چەواشە بكەن هەرجارە و بەجۆرێك سیناریۆیەك دروست دەكەن و خەڵكی پێوە سەرقاڵ دەكەن.
روپاك ئەحمەد لە ئەكاونتی خۆی لەتۆڕی كۆمەڵایەتی فەیسبوك سەبارەت بە شەڕی دابەشكردنی زەوی بەسەر كەسوكاری شەهیدان و ئەنفالكراوان و زیندانیانی سیاسی لەنێوان قوباد تاڵەبانی جێگری سەرۆكی حكومەت و وەزارەتی شارەوانی و گەشتوگوزار نوسیویەتی: پەسەندكردنی یاسای بودجە لەپەرلەمانی عێراق و جێگیركردنی پشكی كورد هیچ دەستكەوتێكی بۆ موچەخۆرانی هەرێم نەبو.
ئاماژەی بەوەشداوە: پارتی و یەكێتی بۆ ئەوەی ئەو شكستەی خۆیان پەردەپۆش بكەن، هەڵساون بە چەواشەكردنی خەڵك كە گوایە نێوانیان خراپە.
ئەو پەرلەمانتارەی كۆمەڵ ئەوەشی نوسیوە: ئەم وەڵام و وەڵامكارییە وای كردوە رۆژێكی سۆشیال میدیا بەڕێ بكەن بە سەرقاڵكردنی خەڵك، كەچی لە بنەڕەتدا هەردو حزب هیچ عەیبێكیان نیە و لەنێوان خۆیان رێككەوتون بەردەوام بن لە دزی و بەهەدەردانی پارەی ئەم میللەتە و دابەشكردنی لەنێوان خۆیان و لەسەر قوتی خەڵك بژین.
