بەڕێوەبەری فڕۆکەخانەی نێودەوڵەتیی هەولێر رایگەیاند، گەشتە ئاسمانییەکانی فڕۆکەخانەی هەولێر وەکو رۆژانی رابردوو ئاسایین و نەوەستێندراون.
ئەحمەد هۆشیار، بەڕێوەبەری فڕۆکەخانەی نێودەوڵەتیی هەولێر بە تۆڕی میدیایی رووداوی راگەیاند، “ئەو کاتیۆشایەی لە نزیک فڕۆکەخانەی نێودەوڵەتیی هەولێر کەوتەوە خوارەوە، هیچ زیانیکی گیانیی نەبووە و لە شوێنی کارکردن و مانەوەی کارمەند و گەشتیار نەبووە”. بە گوتەی بەڕێوەبەری فڕۆکەخانەی نێودەوڵەتیی هەولێر، “گەشتە ئاسمانییەکانی فڕۆکەخانە وەکو رۆژانی پێشوو ئاسایین و ئێستا فڕۆکەی گەشتیاری دێن و دەچن”. دەوروبەری کاژێر 09:50 خولەکی شەوی 14ی نیسان هێرش کرایە سەر فڕۆکەخانەی هەولێر. دژە تیرۆری هەرێمی کوردستان رایگەیاند، هێرشەکە لەڕێگەی مووشەکێکەوە کراوە.
