دكتۆر ئاسۆ حەوێزی وتەبێژی وەزارەتی تەندروستی هەرێمی كوردستان ئاشكرایكرد: تائێستا 54 هەزار ڤاكسین گەیشتونەتە هەرێم و چیتر كەس ناتوانێت بەبێ تۆماركردنی ناو ڤاكسین وەربگرێت، چونكە خواست زۆرە لەسەری.
ئاسۆ حەوێزی لە لێدوانێكی تەلەفزیۆنیدا باسی لەوەكردوە: شێوازی دابەشكردنی ڤاكسین بە سیستمی ئۆنلاینە لە رێگەی ئەپلیكەیشنی تایبەت بە هەردو سیستمی “ئەندرۆید” و “ئای ئۆ ئێس”، بەڵام لەمەوبەدوا كەس ناتوانێ بێ ناو تۆماركردن لەو ئەپلیكەیشنانە ڤاكسین وەربگرێت، چونكە داواكاریی لەسەر ڤاكسینی دژە كۆرۆنا زۆر بوە.
رونیشیكردوەتەوە: بۆیە بۆ پێدانی پێكوتە بە هەر كەسێك دەبێ ئەو كەسە ناوی خۆی لە ئەپلیكەیشنی پێكوتەی دژە كۆرۆنا تۆمار بكات و بە شێوەیەكی گشتیش لە هەمو بنكە تەندروستیەكاندا لە هەمو شارەكان پێكوتەی دژە كۆرۆنا بەردەستە.
وتەبێژی وەزارەتی باسی لەوشەكردوە: بەهۆی رۆڵی راگەیاندن و لێدوانەكانی رێكخراوی تەندروستی جیهانی، هاوڵاتیان زیاتر داوای پێكوتەی فایزەر دەكەن، بەڵام پێكوتەكان هەمویان كاران و باشن و هەموشیان بە دوو جار دەدرێنە هاوڵاتیان، تائێستاش زیاتر لە 54 هەزار پێكوتەی دژە كۆرۆنا گەیشتوەتە هەرێم بەڵام نزیكەی 46 هەزار كەس ناویان بۆ وەرگرتنی پێكوتە تۆمار كردووە، لە رێگەی هاوپەیمانی كۆڤاكسیشەوە بەردەوام لە عێراقەوە پێكوتەمان پێدەگات و لە چەند رۆژی داهاتوشدا كاروانێكی دیكەی پێكوتەی سینۆفارم دەگاتە هەرێم.
