د.یاد نەقشبەندی وتەبێژی بەڕێوەبەرایەتی گشتی تەندروستی سلێمانی دەڵێت: لەگەڵ ئەوەدان بەكارهێنانی ڤاكسین لەلایەن هاوڵاتیانەوە بكرێتە ناچاری، چونكە ئەوە ژیان ئاسایی دەكاتەوە.
د.یاد نەقشبەندی بە دەنگی ئەمریكای راگەیاندوە: ئەو ژەمە ڤاكسینانەی ئێستا دەگات دەتوانم بڵێم بڕەكانی سێ هێندە و چوار هێندەی ئەو بڕانەیە كە لەڕابردو گەیشتونەتە دەستمان، جاران نێوانی دوو بڕ كە دەهات كاتێكی دەویست بەڵام ئێستا خێرا ژەمە ڤاكسینەكان دەگات.
رونیشیكردوەتەوە: ئەوەی گرنگە ئێمە كار لەسەر ئەوە بكەین هاوڵاتیان هان بدەین زۆرترین هاوڵاتی لە كەمترین ماوە پێكوتەی كۆرۆنا وەربگرێت، هەمو ئەو پێكوتانەی دێن فەرمین و لەلایەن وڵاتانی فەرمیەوە ناسێندراوە، بەشێوەیەكی فەرمی دەكڕدرێن و بەكاردێن.
وتەبێژی تەندروستی سلێمانی هێمای بۆ ئەوەشكردوە: : لەگەڵ ئەوەدان وەك وڵاتانی تر بەكارهێنانی ڤاكسین لەلایەن هاوڵاتیانەوە بكرێت بە ناچاری، چونكە ئەگەر هەمو هاوڵاتیان ڤاكسین وەربگرن، قۆناغ بەقۆناغ ژیان ئاسایی دەكەینەوە.
