دیندار زێباری: بڕیاری دادگای سزادراوانی بادینان پەیوەندی بە كاری رۆژنامەوانیانەوە نەبووە

رێكخەری ڕاسپاردە نێودەوڵەتییەكانی هەرێم وەڵامی راپۆرتەكەی  رێكخراوی چاودێریكردنی مافەكانی مرۆڤ (هیومان رایتس وۆچ) لەبارەی دادگاییكردنی ژمارەیەك رۆژنامەنوس و چالاكوانی بادینان دەداتەوەو دەڵێت”بڕیاری دادگا پەیوەندی بە كاری ڕۆژنامەوانی تۆمەتبارانەوە نەبوە.”
رێكخراوی چاودێری مافەكانی مرۆڤ لە رۆژی رۆژنامەگەریی كوردییدا راگەیێندراوێكی لەسەر حوكمدراوانی بادینان بڵاوكردبوەوە و تیایدا باسی لەوەكردبوو، پرۆسەی دادگاییكردنیان “كەموكوڕیی گەورە”ی تێدابووە و لە “ئاستی باڵا”دا دەستوەردانی سیاسیی كراوە.
لەوەڵامی ئەو راپۆرتەدا دیندار زێباری، رێكخەری ڕاسپاردە نێودەوڵەتییەكان لە راگەیەندراوێكدا وتی”دادگا سەربەخۆیە لە حكومەت و دامەزراوە سیاسییەكانی هەرێمی كوردستان.
باسی لەوەشكردبوو، حكومەتی ھەرێم دەست لە پرۆسە یاساییەكان وەرنادات. هاوكات، دەستبەسەركردن و دەستگیركردن تەنیا بە بڕیاری دادگا جێبەجێدەكرێن. ئەم ڕاگیراوانە لە بادینان تاوانباربون بە كۆكردنەوەی زانیاری نهێنی و پێدانیان بە لایەنی بیانی بە بەرامبەر، ئەم زانیاریانە ڕاستەوخۆ ژیانی بەرپرسانی باڵای كورد و بیانی لە كوردستان دەخستە مەترسییەوە.”