سەرۆكی هەرێمی كوردستان رایگەیاند، نەوەیەكی تازە لە عێراق دروست بووە و چیتر دروشمی بێ ناوەڕۆكیان لە سیاسییەكانی وڵات قبووڵ نییە.
نێچیرڤان بارزانی سەرۆكی هەرێمی كوردستان لە چاوپێكەوتنێكیدا لەگەڵ كەناڵی شەرقییەدا باسی لەوەكرد، نەوەی ئێستای عێراق نەوەی پێش 10 ساڵ نییە، ئەوەی ساڵی 2003 لە دایكبووە، ئێستا تەمەنی 18 ساڵە و ئەوە خۆی لە خۆیدا ئێستا ئامادەیە بۆ گۆڕانكاریی.
سەرۆكی هەرێم وتیشی، گەلی عێراق مومكین نییە هەر دروشمی بێ ناوەڕۆك لە سیاسییەكانی عێراقی قبووڵ بكات و ژیانی دەوێت، كێشەكانی هەرێمی كوردستان و بەغداش بەشێكن لەو سەقامگیرییە سیاسییەی كە عێراق دەبێت بەخۆیەوە بیبینێت.
نێچیرڤان بارزانی ئاماژەی بەوەشكرد، دەبێت هەموو لایەن و پێكهاتەكان لێكگەیشتن و روانگەیەكی هاوبەشیان بۆ داهاتووی عێراق هەبێت و سوود لە هەڵەكانی رابردوو وەربگرن.
