مەسرور بارزانی سەرۆكی حكومەتی هەرێم لەبارەی ئاگركەوتنەوە لە نەخۆشخانەیەكی بەغدا ئامادەیی خۆی بۆ پێشكەشكردنی هەمو هاوكارییەكی پێویست پیشاندا، بەتایبەتی لە بواری تەندروستی و پێشوازیكردن لە بریندارانی روداوەكە.
مەسرور بارزانی لە راگەیەندراوێكدا ئاماژەی بەوەداوە: بە داخێكی زۆرەوە رووداوی دڵتەزێنی ئاگركەوتنەوە لە نەخۆشخانەی “ئیبن ئەلخەتیب”ی بەغدام بیست كە بوە هۆی گیان لەدەستدان و برینداربونی دەیان كەس.
رونیشیكردوەتەوە: پەیوەندیی بە مستەفا كازمی سەرۆكوەزیرانی عێراقەوە كردوە و ئامادەیی دامودەزگاكانی حكومەتی هەرێمی بۆ پێشكەیشكردنی هەمو جۆرە هاوكاریی و یارمەتیەك راگەیاندوە و هیوای خواستوە كارەساتی لەوجۆرە دووبارە نەبێتەوە.
پێشتریش نێچیرڤان بارزانی سەرۆكی هەرێمی كوردستان سەرەخۆشی خۆی راگەیاندبو، ئامادەیی نەخۆشخانەكانی هەرێمیشی بۆ وەرگرتنی بریندارەكان دەربڕیبو.
