تاهیر عەبدوڵا بەڕێوەبەری گشتی فڕۆكەخانەی نێودەوڵەتی سلێمانی دەڵێت: بەهۆی كۆرۆناوە داهاتی فڕۆكەخانە بەشێوەیەكی زۆر دابەزیوە و دەبێت حكومەتی هەرێم خەرجیەكانی پڕ بكاتەوە.
تاهیر عەبدوڵا بە دەنگی ئەمریكای وتوە: لەو كاتەی كۆرۆنا بڵاوبویەوە لە هەموو جیهان وردە وردە كاریگەریە نەرێنیەكەی لەسەر بواری گەشتیاری دەركەوت، لە گواستنەوەی ئاسمانیش وەكو هەر بوارێكی تری رێكاری پێویست گیرایە بەرو بوە هۆی ئەوەی زۆر كەس نەتوانێت سەفەری ئاسایی بكات هەرچەندە ئەگەر بەراورد بكەین لەگەڵ ساڵی 2016 تا 2019، دەتوانم بڵێم نزیكەی 55% بۆ 60% گەشتەكان دەستی پێكردۆتەوە، چونكە بەڕاستی ئێستا خەڵكانێكی كەم گەشت دەكەن.
ئاماژەی بەوەشداوە: ئەگەر سەیری ژمارەی ئەو فڕۆكانە بكەین لە رابردودا هاتوچۆی فڕۆكەخانەیان كردوە بە بەراورد لەگەڵ ساڵانی پێشودا زۆر كەمی كردوە و هەندێك كۆمپانیا هەیە نوسینگەكانی خۆیان داخستوە، بۆیە داهاتی فڕۆكەخانە لە 30% بۆ 35% دابەزیوە بەبەراورد بەساڵانی پێشو، دەبێت حكومەتی هەرێم خەرجیەكان پڕ بكاتەوە.
سەبارەت بەوەی كە وەرگرتنی ڤاكسین كراوە بە مەرجی گەشتكردن تاهیر عەبدوڵا وتی: ژمارەیەكی كەم خەڵك پێكوتەی یەكەمیان وەرگرتوە و نەشبوە بەمەرج و تەنها پشكنینی پی سی ئاڕ بوە بەمەرج تائێستا، هەركاتێك حكومەتی عێراق یان حكومەتی هەرێم ئەو مەرجەی دانا ئێمەش جێبەجێی دەكەین.
