رێواز فایەق سەرۆكی پەرلەمان كوردستان ئاشكرایدەكات: حكومەت وەڵامی نەداونەتەوە بۆ بەشداریكردن لە دانیشتنی تایبەت بە لێبڕینی موچە و ئەویش پۆلیس نییە تا حكومەت ناچار بكات بچێتە پەرلەمان.
لە دانیشتنی پەرلەمانی كوردستان لە وەڵامی ئەوەی بۆچی حكومەتی هەرێم ئامادەی دانیشتنەكە نەبوە بۆ تاووتوێ كردنی بابەتی لێبڕینی موچەی فەرمانبەران، رێواز فایەق ئاماژەی بەوەدا: داواكاریەكانی پەرلەمانتاران بۆ ئامادەبونی حكومەت پشتگوێ نەخراون.
رونیشیكردوەتەوە: ئەو داواكاریانە ئاڕاستەی حكومەت كراون، بەڵام حكومەت وەڵامی داواكاریەكەی نەداوە و تەنانەت داوای ئەوەشی نەكردوە كە وادەكە درێژ بكرێتەوە، بۆیە بەبێ ئامادەبونی حكومەت گفتوگۆكردن لەسەر ئەو پرسە بەرهەمی نابێت.
سەرۆكی پەرلەمان لە بەشێكی تری قسەكانیدا وتی: من پۆلیس نیم تا حكومەت بهێنم، هەروەها هەڵوەشانەوەی حكومەتیش بە زۆرینەی پەرلەمان دەبێت و كابینەی حكومەتیش زۆرینەی پەرلەمانی هەیە، بۆیە با یەكتری بریندار نەكەین و حكومەت لەناوخۆیدا ئەو دابەشبونەی نییە كە پەرلەمان هەیەتی.
