بەشیر حەداد جێگری دوەمی سەرۆكی پەرلەمانی عێراق دەڵێت: هیچ بەربەستێك لە بەردەم جێبەجێكردنی رێككەوتنی نێوان هەرێم و بەغدا لەبارەی یاسای بودجەوە نییە و بەرپرسێكی پێشوی وەزارەتی دارایی عێراقیش دەڵێت: چاوەڕێ دەكرێت ناردنی پشكی هەرێم بكەوێتە مانگی داهاتو.
بەشیر حەداد بە ماڵپەڕی فەرمی پارتی وتوە: هەر كاتێك دەست بە دابەشكردنی پشكی پارێزگاكانی عێراق كرا، پشكی هەرێمی كوردستانیش پێویستە رەوانە بكرێت، چونكە بودجە بوەتە یاسا و هیچ بەربەرستێكیش لە بەردەم جێبەجێكردنی رێككەوتنی نێوان هەرێم و بەغدا نییە، لەبەر ئەوەی هەردولا پابەندبونی خۆیان راگەیاندوە.
باسی لەوەشكرد: بۆ جێبەجێكردن و دانانی میكانیزمێك بۆ رێككەوتنەكە بڕیارە شاندێكی هونەری وەزارەتی دارایی هەرێم سەردانی بەغدا بكات، پێویستە بەغداش پشكی هەرێم بۆ هەر چوار مانگی ئەمساڵ رەوانە بكات.
لەلایكی ترەوە فازڵ نەبی بریكاری پێشوی وەزارەتی دارایی عێراق بە هەمان سەرچاوەی وتوە: جێبەجێكردنی رێككەوتنی هەرێم و بەغدا هیچ كێشەیەكی لە بەردەمدا نییە و تەنیا ئەوەی دەوێت شاندێكی هەرێم بچێتە بەغدا بۆ چۆنیەتی خەرجكردن و دانانی ئالیەتێك بۆ خەرجكردنی، بۆیە گرنگە پەلە بكرێت لە چونی شاندەكە.
