مەسرور بارزانی سەرۆكی حكومەتی هەرێمی كوردستان دەڵێت: بە سەرجەم بڕگەكانی یاسای بودجە و ئەوەی لە سەر ئێمەیە جێبەجێی دەكەین بۆیە چاوەڕێ دەكەین سەرۆك وەزیرانی فیدراڵ بەشە بودجەی هەرێم بنێرێت.
مەسرور بارزانی لە چاوپێكەوتنێكدا لەگەڵ كەناڵی ئەلجزیرە ئاماژەی بەوەداوە: ئێمە وەك حكومەتی هەرێم پابەندین بە جێبەجێكردنی پرۆژە یاسای بودجەی 2021ی عێراق، ماوەی 10 مانگ دەبێت حكومەتی فیدراڵ هیچ بڕە پارەیەكی بۆ هەرێمی كوردستان نەناردوە، بۆیە چاوەڕێ دەكەین سەرۆك وەزیران بەشە بودجەی هەرێم بنێرێت.
سەبارەت بە هێرشەكانی سەر هەرێمی كوردستان و تۆمەتباركردنی حەشدی شەعبی وتویەتی: چەندین گروپی جیاواز لەنێو حەشدی شەعبی هەن بۆیە ناكرێت ئێمە ئەو كارە بەشێوەیەكی گشتی لێك بدەینەوە و تەواوی حەشد تۆمەتبار بكەین، هەروەها گروپیش هەن لە دەرەوەی یاسان و بەشێكیش نین لە دەزگا فەرمییەكان و روبەڕوی حكومەتیش دەوەستنەوە، بۆیە دەبێ ئەو جۆرە گروپ و كەسانە بهێنرێنە ژێر كۆنتڕۆڵی دەوڵەتەوە.
سەرۆكی حكومەتی هەرێم باسی لەوەشكردوە: لە دوای پەسەندكردنی یاسای بودجە پەیوەندییەكانی هەرێم و بەغدا باشتر بون، بەڵام لەروی پڕاكتیكی و كردەییەوە هێشتا هیچ كارێك نەكراوە، چاوەڕێ دەكەم و هانی سەرۆك وەزیران دەدەم پشكی بودجەی هەرێم رەوانە بكات، هیچ بەربەستێكی یاسایی نەماوە تەنیا ئەوە ماوە یاساكە بەزوترین كات جێبەجێ بكرێت، ئەمەش پێموایە هەنگاوێكی گرنگ و پێویستە.
