وەزارەتی بازرگانی عێراق ئاشكرایكرد، بەرهەمی خورمای ئەمساڵ گەیشتوەتە 735 هەزار تۆن و بەوەش عێراق بوەتە چوارەم گەورەترین وڵاتی بەرهەمهێنەری خورما.
حەمید نایف وتەبێژی وەزارەتی بازرگانی لە لێدوانێكدا بۆ رۆژنامەی سەباحی فەرمی باسی لەوەكردوە: عێراق كۆتا وەجبەی هەناردەی خورمای بۆ دەرەوە تەواو كردووە كە بەرهەمی ساڵی رابردوو بووە كە 600 هەزار تۆن بووە لە سەرجەم جۆرەكانی خورما.
رونیشیكردووەتەوە: عێراق بووە بە چوارەم وڵاتی جیهان لە بەرهەمهێنانی خورما، دوای گەشەسەندنی كێڵگەكان ژمارەی دارخورماكان گەیشتونەتە 17 ملیۆن، ئەوەش دوای ئەوەی ساڵی 2019 بڕیاردرا هێنانی خورما قەدەغە بكرێت كە بووە هۆی پاڵنەرێكی گەورە بۆ جوتیارانی عێراقی تا گرنگی بە بەرهەمی خۆیان بدەن.
وتەبێژەكەی وەزارەتی كشتوكاڵی عێراق جەختیلەوەشكردوەتەوە: قەبارەی بەرهەمی ناوخۆیی گەیشتوەتە 735 هەزار تۆن و نرخی كڕینەوەی خورماش لە جوتیاران لە 200 هەزار دینارەوە بەرزكراوەتە بۆ 700 هەزار دینار بۆ یەك تۆن.
لە عێراق ساڵانە 150 هەزار بۆ 200 هەزار تۆن خورما بەكاردەهێنرێت و ئەوەی دەمێنێتەوە هەناردەی هیندستان، توركیا، سوریا، ئیمارات و بەنگلادیش دەكرێت، ئەوەش سەرەڕای ئەوەی بەشێكی دەنێردرێتە بازاڕەكانی ئەوروپا و ئەمریكا.
