سەرۆكی حكومەتی هەرێمی كوردستان هۆكاری هێرشەكەی داعشی بۆ سەر سەنگەرەكانی پێشمەرگە بۆ بوونی بۆشایی ئەمنی لەو ناوچە گەڕاندەوە و رایگەیاند، “جەخت لە گرنگیی جێبەجێكردنی هەماهەنگیی ئەمنی لە نێوان سوپای عێراق و هێزی پێشمەرگە دەكەینەوە”.
مەسرور بارزانی، سەرۆكی حكومەتی هەرێمی كوردستان لە پەیامێكدا لەبارەی هێرشەكەی داعش رایگەیاند، “وەك چەندینجار دووپاتمان كردووەتەوە، داعش خەریكی خۆڕێكخستنەوەیە و هێشتاش هەڕەشە و مەترسییەكی راستەقینەیە لە چەندین ناوچەی عێراق، بە تایبەتی لە ناوچە كوردستانییەكانی دەرەوەی ئیدارەی هەرێم”.
لە لایەكی دیكەوە سەرۆكی هەرێمی كوردستان لە پەیامێكیدا ئەو بۆشاییە ئەمنییەی لە ناوچە ناكۆكی لەسەرەكان دروستبووە بە “مەترسییەكی زۆر گەورە” لەسەر هەرێمی كوردستان و هەموو عێراق باسدەكات، لەو پێناوەشدا داوای دروستكردنی هێزی هاوبەش لەنێوان پێشمەرگە و سوپای عێراق دەكات و ئامادەیی هەرێمی كوردستان بۆ هەموو جۆرە هاوكارییەك لەو پێناوەدا دەردەبڕێت.
مەسرور بارزانی ئاماژە بە گرنگیی راهێنان و هاوكاریكردنی هێزەكانی پێشمەرگە و سوپای عێراق لەلایەن هاوپەیمانیی نێودەوڵەتی دەدات و دەڵێت، “مانەوەیان لە عێراق بۆ رووبەڕووبوونەوەی تیرۆریستانی داعش، بە گرنگ و پێویست دەزانین بۆ شكستپێهێنانی یەكجارەكی داعش”.
لە هێرشەكەی بەرەبایانی شەممەی چەكدارانی داعشدا بۆ سەنگەرەكانی پێشمەرگە لە میحوەری رۆژئاوای كەركوك سێ پێشمەرگە شەهید و دووی دیكەش بریندار بوون.
دەقی پەیامی سەرۆكی حكومەتی هەرێمی كوردستان:
بە داخێكی زۆرەوە شەوی ڕابردوو، لە ئەنجامی هێرشی تیرۆریستانی داعش بۆ سەر هێزی پێشمەرگە لە سنووری پردێ ، چەند پێشمەرگەیەك شەهید و برینداربوون. پرسە و سەرەخۆشی خۆم بە بنەماڵە و كەسوكاری شەهیدەكان ڕادەگەیەنم و خۆم بە هاوبەشی خەمیان دەزانم . هیوای چاكبوونەوەی خێراش بۆ بریندارەكان دەخوازم .
وەك چەندین جار دووپاتمان كردووەتەوە ، داعش خەریكی خۆڕێكخستنەوەیە و هێشتاش هەڕەشە و مەترسییەكی ڕاستەقینەیە لە چەندین ناوچەی عێراق ، بە تایبەتی لە ناوچە كوردستانییەكانی دەرەوەی ئیدارەی هەرێم ، كە سوود لەو بۆشاییە ئەمنیە وەردەگرێت كە لەو سنوورانەدا هەیە . بۆیە جەخت لە گرنگیی جێبەجێكردنی هەماهەنگیی ئەمنی لە نێوان سوپای عێراق و هێزی پێشمەرگە دەكەینەوە.
هەروەها بەردەوامبوونی ڕاهێنان و هاوكاریكردنی هێزی پێشمەرگە و سوپای عێراق لە لایەن هاوپەیمانیی نێودەوڵەتی و مانەوەیان لە عێراق بۆ ڕووبەڕبوونەوەی تیرۆریستانی داعش، بە گرنگ و پێویست دەزانین بۆ شكستپێهێنانی یەكجارەكی داعش و نەمانی هەڕەشە و مەترسییەكان بۆ سەر ئاسایشی هەرێمی كوردستان و عێراق بە گشتی.
مەسرور بارزانی
سەرۆكی حكومەتی هەرێمی كوردستان
2021/5/1
