توشبوانی ڤایرۆسی كۆرۆنا لە هیندستان ژمارەیەكی پێوانەیی تۆمار كرد و لە ماوەی 24 كاتژمێری رابردودا زیاتر لە 400 هەزار توشبوو تۆماركرا، هەروەها زیاتر لە 3 هەزار و 500 كەسیش گیانیان لەدەستداوە.
بەپێی داتاكانی ماڵپەڕی worldometers، رۆژی هەینی لە وڵاتی هندستان 402 هەزار و 110 توشبوی ڤایرۆسی كۆرۆنا تۆمار كراون، ئەوەش ژمارەیەكی پێوانەییە و پێشتر تۆمار نەكراوە.
بەپێی داتاكان، هەروەها لە هەمان رۆژدا 3 هەزار و 522 كەس لە هیندستان بە پەتاكە كۆچی دواییان كردوە و ئەوەش ژمارەیەكی زۆر بەرزە و رۆژانە بەردەوام تۆمار دەكرێت.
بەوەش كۆی گشتی توشبوانی كۆرۆنا لە هیندستان 19 ملیۆن كەسی تێپەڕاند و ژمارەی گیانلەدەستدانیش نزیكی 212 هەزار كەس بووەتەوە، ئەوەش لەكاتێكدایە ژمارەی توشبوانی پەتای كۆرۆنا لە جیهاندا گەیشتوەتە زیاتر لە 152 ملیۆن كەس.
