هەناردەی نەوتی عێراق بۆ ئەمریكا زیادی كردووە

فەرمانگەی زانیارییەكانی وزەی ئەمریكا ئاشكرای كرد، هەفتەی رابردوو ئاستی هاوردەكردنی نەوت لە عێراقەوە بۆ نزیكەی نۆ هێندە زیادی كردوە، هەروەك بڕێكی زیاتر نەوتیان لە چەند وڵاتێكی دیكەشەوە هاوردە كردووە.
بەپێی راگەیەنراوێكی فەرمانگەی زانیارییەكانی وزەی ئەمریكا، هەفتەی رابردوو لە نۆ وڵاتەوە رۆژانەی پێنج ملیۆن و 728 هەزار بەرمیل نەوتیان هاوردە كردووە، كە بە بەراورد لەگەڵ هەفتەكانی پێشووتردا بە بڕی ملیۆنێك و 235 هەزار بەرمیل زیادی كردووە.
رونیشیكردوەتەوە، هەر لە هەفتەی رابردوودا بە تێكڕا رۆژانە 270 هەزار بەرمیل نەوتیان لە عێراقەوە هاوردە كردووە، ئەمەش لە كاتێكدایە پێشتر رۆژانە 34 هەزار بەرمیلیان لەو وڵاتەوە هاوردەدەكرد.
فەرمانگەی زانیارییەكانی وزەی ئەمریكا باسی لەوەشكرد، لە هەفتەی رابردوودا رۆژانە سێ ملیۆن و 492 هەزار بەرمیل نەوتیان لە كەنەدا، 608 هەزار بەرمیل لە مەكسیك، 480 هەزار بەرمیل لە سعودیە و 294 هەزار بەرمیلیشیان لە كۆڵۆمبیاوە هاوردە كردووە.