وەزارەتی پێشمەرگەی حكومەتی هەرێمی كوردستان لە راگەیەندراوێكدا لەسەر هێرشەكەی داعش بۆ سەر سەنگەرەكانی پێشمەرگە ئاماژەی بەوەداوە، پێشتر چەندین جار هۆشداریان دابوو، لەبارەی مەترسییەكانی داعش لەو ناوچانەی بۆشایی ئەمنیان تێدایە.
وەزارەتی پێشمەرگە لە راگەیەندراوەكەیدا باسی لەوەكردوە، لە ئەنجامی بوونی بۆشایی ئەمنی لەنێوان هێزی پێشمەرگە و سوپای عێراقی، چەكدارانی داعش لە بەرزاییەكانی “زورگەزراو” لەسنوری میحوەری پێنج پەلاماری سەنگەرێكی لیوای 10ی پیادەیان دا، پەلامارەكە بەرپەرچ درایەوەو چەكدارانی ئەو رێكخراوە راونران.
وەزارەتی پێشمەرگە بە بیری هێناوەتەوە كە پێشتر چەندین جار هۆشداریان دوە لە بوونی بۆشایی ئەمنی و باسی لەوەكردووە، هۆكاری ئەو هەلقۆستنەوەی داعش بوونی ئەو بۆشاییە ئەمنییە كە لەنێوان هێزی پێشمەرگە و سوپای عێراقدا هەیە، بۆ ئەمەش جەختدەكەنەوە كە ئەو ناوچانە پێویستیان بەهێزی هاوبەش و هاوكاری و هەماهەنگی گشتگیر و هەمەلایەن هەیە لەگەڵ سوپای عیراقدا.
وەزارەتی پێشمەرگە راشیگەیاندووە، وەڵامی توندیان بۆ ئەو هێرشەی داعش دەبێت، هەروەك هاوڵاتیانی هەرێمی كوردستانیشی دڵنیا كردوەتەوە، كە ئاسایشی هەرێمی وەك هەمیشە پارێزراو دەبێت.
