كۆمسیۆنی باڵای سەربەخۆی هەڵبژاردنەكانی عێراق ئاشكرایكرد، لە پارێزگای هەولێر 16 كەس و لە سلێمانی 32 كەس و دهۆك 6 كەس خۆیان بۆ هەڵبژاردنی داهاتووی پەرلەمانی عێراق پاڵاوتووە، لە پارێزگای كەركوكیش زۆرترین كەس خۆیان بۆ ئەو 12 كورسییە پاڵاوتووە كە هەیەتی.
كۆمسیۆنی باڵای سەربەخۆی هەڵبژاردن لەعێراق بڵاویكردووەتەوە: بەپێی دوایین ئامار تا رۆژی هەینی 30ی نیسانی 2021 بۆ 18 كورسییەكەی پارێزگای سلێمانی تائێستا 32 كەس خۆیان كاندید كردوە، هەروەها بۆ 15 كورسی پارێزگای هەولێر 16 كەس خۆیان كاندید كردوە.
رونیشكراوەتەوە: بۆ كورسییەكانی پارێزگای دهۆكیش تائێستا 6 كەس خۆیان كاندید كردوە و لە كەركوكیش 92 كەس بۆ بەدەستخستنی 12 كورسی ئەو پارێزگایە خۆیان كاندید كردووە.
بڕیارە مانگی 10ی ئەمساڵ هەڵبژاردنی پێشوەختی پەرلەمانی عێراق ئەنجام بدرێت، رۆژی شەممە 1ی ئایاری 2021 كۆتا وادەبوو بۆ رادەستكردنی ناوی كاندیدەكان بە كۆمسیۆن.
