هەر یەك لە ئێران و ئەمریكا رەتیدەكەنەوە هیچ رێككەوتنێكیان كردبێت لەبارەی گۆڕینەوەی زیندانییەكان و كۆتاییهێنان بە دەستبەسەرداگرتنی بەشێك لە داراییەكانی تاران لە لایەن واشنتۆنەوە.
نێد پرایس وتەبێژی وەزارەتی دەرەوەی ئەمریكا رایگەیاند، ئەو هەواڵانەی باس لە ئازادكردنی چوار بەندكراوی ئێرانی و كۆتاییهێنان بە دەستبەسەرداگرتنی بڕی حەوت ملیار دۆلار لە داراییەكانی ئێران دەكەن دوورن لە راستییەوە.
لای خۆشیەوە مەجید تەخت رەوانچی نوێنەری هەمیشەیی ئێران لە نەتەوەیەكگرتوەكان رایگەیاند، ئەو هەواڵانە پشتڕاستناكەنەوە كە باس لە خواستی واشنتۆن بۆ ئازادكردنی چوار بەندكراوی ئێرانی دەكەن كە بە تۆمەتی سیخوڕی لە زیندانەكانی ئەمریكادان.
وتیشی، ئێران بەردەوام جەخت لە خواستی خۆی بۆ گۆڕینەوەی زیندانیان دەكات لەگەڵ ئەمریكا.
ئەمەش دوای ئەوە دێت كە كەناڵی مەیادینی لوبنانی كە نزیكە حكومەتی تاران بڵاویكردەوە، ئەمریكا رازی بووە حەوت ملیار دۆلار پارەی دەستبەسەرداگیراوی ئێران بگەڕێنێتەوە و چوار بەندكراوی ئێرانیش ئازاد بكات.
