وەزیری ئەوقافی هەرێمی كوردستان رایگەیاند، لە ماوەی رابردوودا بەشێكی زۆری مزگەوتەكان پابەند رێكارەكانی خۆپارێزی لە زیاتر تەشەنەسەندنی كۆرۆنا بوون، باسی لەوەشكرد، لەچەند رۆژی داهاتوشدا بۆ ئەنجامدانی نوێژی جەژن و سێ رۆژی جەژنی رەمەزان رێنمایی نوێ دەردەچێت.
پشتیوانی سادق وەزیری ئەوقاف كاروباری ئایینی هەرێمی كوردستان لە میانی سەردانی بۆ شاری سلێمانی و مزگەوتی گەورەی شارەكە رایگەیاند، دوای ئەوەی لەماوەی رابردودا و بۆ ماوەی 10 رۆژ مزگەوت و شوێنە گشتییەكان بۆ رێگریكردن لەتەشەنەسەندنی ڤایرۆسی كۆرۆنا داخران، 99%ی مزگەوتەكان پابەندی بڕیارەكە بون و لەچەند رۆژی داهاتوشدا بۆ ئەنجامدانی نوێژی جەژن و سێ رۆژی جەژنی رەمەزان رێنمایی نوێ دەردەچێت.
ئاماژەی بەوەشكرد، لەسەر فەرمانی سەرۆكی حكومەتی هەرێم بڕیاردرا لەسەر بودجەی وەزارەتی ئەوقاف باڵەخانەیەكی نوێ بۆ پاراستنی شوێنەوار، دەستنوس و كتێبخانەی مزگەوتی گەورەی سلێمانی دروستبكرێت و دوای جەژنیش هەنگاوەكانی ئەو پرۆژەیە دەستپێدەكات.
