سەرۆكایەتی پەرلەمانی كوردستان لە راگەیەنراوێكدا بڵاویكردەوە، رۆژی چوارشەممە 5ی ئایار دانیشتنی پەرلەمان دەستپێدەكاتەوە، بە هۆیەوە بانگهێشتی ئەندامەكانی دەكات و بڕیارە لە دانیشتنەكەدا خوێندنەوە بۆ سێ پێشنیازە یاسا و پڕۆژەیاسایەك بكرێت.
بەگوێرەی راگەیەنراوەكەی سەرۆكایەتی پەرلەمانی كوردستان، دانیشتنی ژمارە 12ی ئاسایی خوولی بەهارەی ساڵی سێیەم لە خوولی هەڵبژاردنی پێنجەمی پەرلەمانی كوردستان، كاتژمێر 11ی پێشنیوەڕۆی رۆژی چوارشەممە 5ی ئایار دەست پێدەكات.
بڕیارە كارنامەی دانیشتنەكەی رۆژی چوارشەممە (3) تەوەر لەخۆبگرێت، كە لە تەوەری یەكەمدا، (3) پێشنیازە یاسا خوێندنەوەی یەكەمی بۆ بكرێت، كە پێشنیازە یاساكان بریتین لە “پاراستنی بەڵگەنامە و دەستنووسەكان” و “پاراستنی بەڵگەنامەی هەرێمی كوردستان” و “پاراستنی بەڵگەنامە و ئەرشیفی نەتەوەیی لە هەرێمی كوردستان”.
تەوەری دووەمی دانیشتنەكە خستنەڕووی بیرۆكەی پەرلەمانتار “لیزا فەلەكەدین كاكەیی” پەیوەست بە “وزەی خۆر وەك سەرچاوەیەكی بەرهەمهێنانی كارەبا لەهەرێمی كوردستان” دەبێت.
تەوەری سێیەم، خوێندنەوەی دووەم بۆ پڕۆژەیاسای “وەزارەتی كارەبا لە هەرێمی كوردستان” دەبێت.
