خالید دۆسكی بەرپرسی ئۆفیسی پارێزگای دهۆكی كۆمسیۆنی هەڵبژاردنەكان ئاشكرایكرد: ئۆفیسەكانی كۆمسیۆن داوا دەكەن لە دایكبوانی ساڵانی 2001 تا 2003 بایۆمەترییان بۆ بكرێتەوە و چاوەڕێی وەڵامن.
خالید دۆسكی بە ماڵپەڕی فەرمی پارتی وتوە: پرۆسەی بایۆمەتریی دەنگدەران كۆتایی هاتوە بەڵام ئێمە بە نوسراوی فەرمی داوامان لە كۆمسیۆن كردوە ئەوانەی لەدایكبوی ساڵەكانی 2001 تا 2003ن، دیسان تۆمار بكرێن و پرۆسەكە بەس بۆ ئەوانە بێت.
ئاماژەی بەوەشداوە: نیوەیان بەشداری بایۆمەتریان كردوە و تەنیا 50٪ی ماوە، بۆیە ئەگەر بڕیار بدرێت تا هەڵبژاردن زۆربەیان خۆیان تۆمار دەكەن.
بەرپرسەكەی ئۆفیسی پارێزگای دهۆكی كۆمسیۆنی هەڵبژاردنەكان جەختیلەوەشكردوەتەوە: هێشتا ئەنجومەنی كۆمسیۆن وەڵامیان نەداوینەتەوە و زۆربەی ئوفیسی پارێزگاكانیش هەمان داواكارییان ناردوە و چاوەڕێی وەڵامین، بەڵام ئەوانەی بەشداری بایۆمەتریان كردوە كێشەیان نییە بۆ رۆژی دەنگدان تەنیا كارتەكەیان لابێت.
